3/21/2012

踏話頭


  閩南語字音字形比賽,列為全國語文競賽的正式項目。聽著這个消息,予人感覺歡喜閣驚惶。歡喜的是:閩南語音字已經是正式的「全國語文」;驚惶的是:拄才開始,毋知欲按怎才好。無像華語的字音字形,已經有真濟參考的資料。

  個人自細漢著講台語,後來綴洪教授惟仁學拼音。佇十外年前有「鄉土語文競賽」的時,著捌參加台語音字的比賽;這幾年來,又閣有全國性的比賽,嘛攏有佮人鬥鬧熱。後來,學生組的比賽開始,鼓勵學生佮我家己的囡仔參加比賽,嘛學了真有趣味。

  舊年,我三个囡仔拄好讀高中、國中、小學,我共講:今年恁三个我做一擺教,明年以後,著無愛閣舞這項工課。後來,桃園縣教育處希望我會當鬥相共擔任「閩南語字音字形集訓」的召集人。家己比賽是真簡單,欲教囡仔著卡困難,台語無講慣勢,所以著愛整理一寡詞彙來共教。欲擔任召集人,實在是頭殼𢯾咧燒,無教材是欲按怎教人?古早人講:頭剃落啊,無洗嘛袂煞哩,就按呢開始收集資料、研究教法。好佳哉,今年的選手攏真認真,總算無去卸著桃園的體面,予我對教育處有一个交待。

  真濟佇桃園教台語的好朋友,希望我會當提供一寡資料予做參考。逐家無棄嫌,我是真歡喜。毋過,這聲我又閣頭疼啊!。因為做家己的教材,若有毋拄好的所在,咱會當修改、解釋;資料分予眾人,若有毋著,是會去「誤人子弟」。無法度,只好閣再蹽落去,將所有的資料一再修改、整理、校對,才有今旦日印出來的這幾本冊。逐家若感覺袂,著食好鬥相報,予對台語音字有興趣的人,有參考的資料,著袂感覺遐歹學,嘛算是咱對台語文的推廣,盡淡薄仔心意。抑若有欠點的所在,著請逐家海涵,並且多多指教。

                                        闕世榴    2012.01

沒有留言:

張貼留言